ಬೆಂಗಳೂರು (ಜೂನ್.15); ದಿನದಿಂದ ದಿನಕ್ಕೆ ವಿವಿಧ ತಿರುವು ಪಡೆಯುತ್ತಿರುವ ಐಎಂಎ ಬಹುಕೋಟಿ ವಂಚನೆ ಪ್ರಕರಣ ಶನಿವಾರ ಮತ್ತೊಂದು ತಿರುವು ಪಡೆದಿದೆ. ಮನ್ಸೂರ್ ಖಾನ್ ಮಾಲೀಕತ್ವದ ಐಎಂಎ ಕಂಪೆನಿಯಲ್ಲಿ ವಿದೇಶಿ ಹಣ ಹೂಡಿಕೆಯಾಗಿರುವುದನ್ನು ಪತ್ತೆ ಹಚ್ಚಿರುವ ಜಾರಿ ನಿರ್ದೇಶನಾಲಯ ಅಧಿಕಾರಿಗಳು ಈ ಕುರಿತು ಮತ್ತೊಂದು ಸ್ವತಂತ್ರ್ಯ ದೂರು ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ಐಎಂಎ ಕಂಪನಿಯಲ್ಲಿ ವಿದೇಶಿ ಹೂಡಿಕೆ, ವಿದೇಶಿ ಹಣಕಾಸು ವಹಿವಾಟು ಹಾಗೂ ವಿದೇಶಿ ವಿನಿಮಯ ಮಾಡಿರುವುದನ್ನು ಪತ್ತೆ ಹಚ್ಚಿರುವ ಜಾರಿ ನಿರ್ದೇಶನಾಲಯ ಅಧಿಕಾರಿಗಳು ನಿನ್ನೆ ಕಮರ್ಶಿಯಲ್ ಸ್ಟ್ರೀಟ್ ಪೊಲೀಸ್ ಠಾಣೆಗೆ ಭೇಟಿ ನೀಡಿ ಅಗತ್ಯ ಮಾಹಿತಿಯನ್ನು ಕಲೆ ಹಾಕಿದ್ದಾರೆ. ಅಲ್ಲದೆ ಇದರ ಆಧಾರದ ಮೇಲೆ ಎಫ್ಇಎಂಎ, ಎಫ್ಇಆರ್ಎ ಹಾಗೂ ಪಿಎಂಎಲ್ಎ ಸೇರಿದಂತೆ ವಿವಿಧ ಕಾಯ್ದೆಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ಐಎಂಎ ಜ್ಯುವೆಲ್ಸ್ ಹೆಸರಿನಲ್ಲಿ ಜನರಿಗೆ ಸಾವಿರಾರು ಕೋಟಿ ವಂಚನೆ ಎಸಗಿದ್ದ ಮನ್ಸೂರ್ ಖಾನ್ ದುಬೈಗೆ ಪರಾರಿಯಾಗಿದ್ದಾನೆ ಎನ್ನಲಾಗುತ್ತಿದೆ. ಏರ್ಪೋರ್ಟ್ಗೆ ತನ್ನ ಕಾರಿನಲ್ಲೇ ಆಗಮಿಸಿದ್ದ ಮನ್ಸೂರ್ ಕಾರ್ ಅನ್ನು ಅಲ್ಲಿಯೇ ಬಿಟ್ಟು ಹೋಗಿದ್ದ ಎನ್ನಲಾಗಿತ್ತು.
ಹೀಗೆ ಆತ ಬಿಟ್ಟುಹೋಗಿರುವ ಐಶಾರಾಮಿ ಕಾರ್ ಇದೀಗ ಪತ್ತೆಯಾಗಿದೆ. ಕೆಎ 01 ಎಂಎಫ್-9010 ಎಂಬ ಸಂಖ್ಯೆಯ ಕಾರು ಮಿಲನ್ ಫಾರೂಕ್ ಎಂಬ ಹೆಸರಿನಲ್ಲಿ ನೋಂದಣಿಯಾಗಿದ್ದು ಕಳೆದ 4-5 ದಿನಗಳಿಂದ ಕೊಡಿಗೇಹಳ್ಳಿ ಫ್ಲೈಓವರ್ ಬಳಿ ನಿಂತಿದೆ. ಈ ಕಾರು ಮನ್ಸೂರ್ ಖಾನ್ ಅವರದ್ದೇ ಎನ್ನಲಾಗುತ್ತಿದೆ.
ಪ್ರಸ್ತುತ ವಾಹನವನ್ನು ಟೋಯಿಂಗ್ ಮಾಡಿರುವ ಹೆಬ್ಬಾಳ ಸಂಚಾರಿ ಪೊಲೀಸರು ಎಸ್ಐಟಿ ಅಧಿಕಾರಿಗಳಿಗೆ ಅದನ್ನು ಒಪ್ಪಡಿಸಿದ್ದಾರೆ.